سومرو نيڪ محمد

نيڪ محمد سومرو : نيڪ محمد سومري، ضلعي جيڪب آباد جي ڳوٺ، ميرپور ٻرڙي ۾، 4 اپريل 1961ع تي جنم ورتو. پاڻ پيشي جي لحاظ کان سرڪاري ملازم آهي. سندس تعليم ايم. اي آهي. هن پرائمري ۽ مئٽرڪ ميرپور ٻُرڙي مان پاس ڪرڻ کانپوءِ سرڪاري ملازمت اختيار ڪئي ۽ وڌيڪ تعليم ملازمت دوران ئي حاصل ڪئي. اڄڪلهه سنڌ حڪومت جي ناڻي کاتي ۾ سيڪشن آفيسر طور ڪم ڪري رهيو آهي ۽ سندس مستقل رهائش ڪراچيءَ ۾ آهي. سنڌ ۽ سنڌ جي ماڻهن سان دلي لڳاءُ رکي ٿو ۽ سندن خدمت ۾ رُڌل رهي ٿو. سرڪاري کاتن ۾ ڪم ڪار سانگي آيل عام ماڻهن توڙي ملازمن جي رهنمائي ڪندو رهندو آهي. سندس چوڻ آهي ته ’جائز ڪم ترت ٿيڻ کپن ۽ ناجائز ڪم نه ٿيڻ گهرجن‘. نيڪ محمد سومرو، سنڌ ۽ سنڌي ماڻهن جي موجوده ابتر حالت، خاص ڪري سرڪاري ادارن ۾ ڪرپشن ۽ سنڌي ماڻهن جي بي حسيءَ تي فڪرمند رهندو آهي. سندس خواهش آهي ته سنڌ جا ماڻهو پنهنجون صلاحيتون ڪم آڻي، زندگيءَ جي هر شعبي- ديني توڙي دنيويءَ ۾ ترقي ڪن، ڌرتيءَ جي وسيلن جي پاڻ مالڪي ڪن، اسڪولن، مدرسن ۽ مسجدن کي آباد ڪن. سومري صاحب کي علم ۽ ادب سان تمام گهڻو چاهه آهي. شاعري به ڪندو آهي. سنڌي ٻوليءَ بابت تاريخي حقيقتن جي غلط اشاعت تي سخت تنقيد ڪندو آهي. ايتريقدر جو سال 1985ع ۾ شايع ٿيل عام معلومات واري ڪتاب ’Who is who and what is what‘ ۾ دنيا جي وڏين ٻولين جي شاعرن واري باب ۾، شاهه عبداللطيف ڀٽائيءَ جو نالو نه ڏسي ڪتاب جي مصنف کي تنقيدي خط لکيائين، جنهن ساڳئي ڪتاب جي 1986ع واري ٻيءَ اشاعت ۾ شاهه عبداللطيف ڀٽائيءَ جو نالو سنڌي ٻوليءَ جي اهم شاعر طور شامل ڪيو. اهڙيءَ طرح ماضيءَ ۾ بي. بي. سي لنڊن تان ’سنڌي سروس‘ هلائڻ لاءِ به لکپڙهه ڪندو رهيو. نيڪ محمد سومري، دنيا جو ننڍي ۾ ننڍو ۽ آسان ترين ڪئلينڊر ’ايڪهين صدي ڪئلينڊر‘ تيار ڪيو آهي، جنهن جي استعمال جو طريقو، دنيا جي چئن ٻولين: سنڌي، اردو، انگريزي ۽ عربيءَ ۾ ڏنو ويو آهي، جنهن جي ذريعي اهو معلوم ڪري سگهجي ٿو ته گذريل سؤ سالن ۾ ڪنهن به تاريخ تي ڪهڙو ڏينهن هو. اهو سنڌيءَ ۾ ڇپيل هڪ منفرد ڪئلينڊر آهي، جيڪو سنڌي لئنگئيج اٿارٽيءَ ڇپائي پڌرو ڪيو آهي.

داخلا ۾ استعمال ٿيل تاريخون

1967.04.04  عيسوي

نيڪ محمد سومري، ضلعي جيڪب آباد جي ڳوٺ، ميرپور ٻرڙي ۾، 4 اپريل 1961ع تي جنم ورتو.

شخصيتون - ڀاڱي جون ٻِيون داخلائون